Во имя Отца и Сына и Святого Духа. Аминь.
(Не спеша крестимся и кланяемся в пояс.)
Боже, милостив буди мне грешному (грешной).
(Также крестимся и кланяемся.)
(Далее на всех коротких прошениях крестимся и кланяемся.)
Господи Иисусе Христе, Сыне Божий, молитв ради Пречистыя Матере и всех святых, помилуй нас. Аминь.

Слава Тебе, Боже наш, слава Тебе.

Царю Небесный, Утешителю, Душе истины, Иже везде сый и вся исполняяй, Сокровище благих и жизни  Подателю, прииди и вселися в ны, и очисти ны от всякия скверны, и спаси, Блаже, души наша.

Святый Боже, Святый Крепкий, Святый Безсмертный, помилуй нас.
(Читается трижды, с крестным знамением и поясным поклоном.)

Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи очисти греха наша; Владыко, прости беззакония наша; Святый, посети и исцели немощи наша, имене Твоего ради.

Господи помилуй (трижды).

Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наши, якоже и мы оставляем должником нашим; и не введи нас во искушение, но избави нас от лукаваго.
(Здесь совершаем крестное знамение и поясной поклон).

Тропарь, глас 1
Воставше от сна, припадаем Ти, Блаже,  и ангельскую песнь вопием Ти, Сильне: Свят, Свят, Свят еси, Боже,  Богородицею помилуй нас.
Слава Отцу и Сыну и Святому Духу:
От одра и сна воздвигл мя еси, Господи,  ум мой просвети и сердце,  и устне мои отверзи,  во еже пети Тя, Святая Троице:  Свят, Свят, Свят еси, Боже,  Богородицею помилуй нас.
И ныне, и присно, и во веки веков:
Внезапу Судия приидет,  и коегождо деяния обнажатся,  но страхом зовем в полунощи:  Свят, Свят, Свят еси, Боже,  Богородицею помилуй нас.

Господи помилуй (12 раз).

Молитва ко Пресвятой Троице.
От сна восстав, благодарю Тя, Святая Троице, многия ради Твоея благости и долготерпения не прогневался еси на мя, лениваго и грешнаго, ниже погубил мя еси со беззаконьми моими; но человеколюбствовал еси обычно и в нечаянии лежащаго воздвигл мя еси, во иже утреневати и славословити державу Твою. И ныне просвети мои очи мысления, отверзи моя уста поучати словесам Твоим, и разумети заповеди Твоя, и творити волю Твою, и пети Тя во исповедании сердечнем, и воспевати всесвятое имя Твое, Отца и Сына и Святаго Духа, ныне и присно и во веки веков. Аминь.

Приидите, поклонимся Цареви нашему Богу.
(поклон)
Приидите, поклонимся и припадем Христу, Цареви нашему Богу.
(поклон)
Приидите, поклонимся и припадем Самому Христу, Цареви и Богу нашему.
(поклон)

Символ веры
Верую во единого Бога Отца, Вседержителя, Творца небу и земли, видимым же всем и невидимым.
И во единого Господа Иисуса Христа, Сына Божия, Единородного, Иже от Отца рожденного прежде всех век; Света от Света, Бога истинна от Бога истинна, рожденна, несотворенна, единосущна Отцу, Имже вся быша.
Нас ради человек и нашего ради спасения сшедшаго с небес и воплотившагося от Духа Свята и Марии Девы, и вочеловечшася.
Распятаго же за ны при понтийстем Пилате, и страдавша, и погребенна.
И воскресшаго в третий день по Писанием.
И возшедшаго на небеса, и седяща одесную Отца.
И паки грядущаго со славою судити живым и мертвым, Егоже Царствию не будет конца.
И в Духа Святаго, Господа, Животворящего, Иже от Отца исходящаго, Иже со Отцем и Сыном спокланяема и сславима, глаголавшаго пророки.
Во едину Святую, Соборную и Апостольскую Церковь.
Исповедую едино крещение во оставление грехов.
Чаю воскресения мертвых, и жизни будущаго века. Аминь.

Молитва утренняя
К Тебе, Владыко Человеколюбче, от сна восстав прибегаю, и на дела Твои подвизаюся милосердием Твоим, и молюся Тебе: помози ми на всяко время, во всякой вещи, и избави мя от всякия мирския злыя вещи и диавольскаго поспешения, и спаси мя, и введи в Царство Твое вечное. Ты бо еси мой Сотворитель и всякому благу Промысленник и Податель, о Тебе же все упование мое, и Тебе славу возсылаю, ныне и присно и во веки веков. Аминь.

Молитва ангелу-хранителю.
Ангеле Божий, хранитель мой святой, на соблюдение мне от Бога с небес данный, прилежно молю тебя: ты меня днесь просвети, и от всякого зла сохрани, ко благому деянию наставь, на путь благой направь. Аминь.

Песнь Пресвятей Богородице.
Богородице Дево, радуйся, Благодатная Марие, Господь с тобою; благословенная Ты в женах и благословен плод чрева Твоего, яко Спаса родила еси душ наших.

Тропарь Кресту и молитва за Отечество
Спаси, Господи, люди Твоя, и благослови достояние Твое, победы православным христианам на сопротивныя даруя, и Твое сохраняя Крестом Твоим жительство.

Тропарь благоверному князю Димитрию Донскому
Велика обрете в бедах тя поборника земля Русская, языки побеждающа. Якоже на Дону Мамаеву низложил еси гордыню, на подвиг сей прияв благословение преподобнаго Сергия, тако, княже Димитрие, Христу Богу молися даровати нам велию милость.
Кондак благоверному князю Димитрию Донскому
Подвиги твоими, святе Димитрие, страну нашу Бог сохрани, давый тебе силу непобедимую. И ныне, предстателю крепкий, соблюдай молитвами святыми град твой Москву невредим от всех навет вражиих.

Тропарь, глас 4
Иже добродетелей подвижник, яко истиный воин Христа Бога, на страсти вельми подвизался еси в жизни временней, в в пениих, бдениих же и пощених образ быв твоим учеником; темже и вселился в тя Пресвятый Дух, Егоже действием светло украшен еси; но яко имея дерзновение ко Святей Троице, поминай стадо, еже собрал еси мудре, и не забуди, якоже обещался еси, посещая чад твоих, Сергие Преподобне отче наш.

Слава Отцу и Сыну и Святому Духу и ныне, и присно, и во веки веков. Аминь.
Кондак, глас 8
Христовою любовью уязвися, Преподобне, и Тому невозвратным желанием последовав, всякое наслаждение плотское возненавидел еси, и яко солнце Отечеству твоему возсиял еси: тем и Христос даром чудес обогати тя. Поминай нас, чтущих пресвятую память твою, да зовем ти: радуйся Сергие богомудре.
Молитва перед учением
Господи Иисусе Христе, Сыне Божий! Низпосли благодать Духа Твоего Святаго, дарующего и укрепляющего душевные и умственные наши силы. Даруй, Господи, нам прилежание, внимание, разумение и смирение, просвети нас знанием Твоей истины, и сотвори возрасти нам утвержденным в заповедях Твоих. Аминь

Премудрый, Преблагий и Всещедрый Господи Иисусе Христе! Даруй здравие и долгоденствие учителям нашим и наставникам. Низпосли благодать Пресвятаго Твоего Духа всем преподающим нам знания на пользу души нашей, научающих нас добру и наставляющим в делах веры. Аминь.

Достойно есть яко воистину блажити Тя Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Слава Отцу и Сыну и Святому Духу, и ныне и присно и во веки веков. Аминь.
Господи помилуй (трижды), благослови.